...

माझ्या पाखराचा जीव,
ओल्या मातीचं शिवार!
कसा सावरू मिठीत,
कोवळ्या आसवांचा भार?

हर्षदा

माती

माती .. 

भुसभूशीत
लुसलुशीत पण अबोल माती
कोणत्यातरी साच्यात
स्वतःला बसवू पाहणारी माती
साचे निराळे, कधी पुरूषी तर कधी स्त्रित्व दाखवणारे..

स्वतःला साच्यात बंद करून,
गुपचूप त्याच्या कूशीत 
निजू पाहणारी माती
साच्याचा नवीन आकार मिळेल,
असे स्वप्नेरी स्वप्न लपवून जगणारी माती..

जिवाच्या आकांताने,
जखमा खात,
साच्यात मावू पाहणारी माती.

धडपड धडपड .. अविश्रांत धडपड..
साच्यात मावण्याची

पण प्रत्येक वेळी,
साचा उपडी केल्यावर
पुर्वीसारखीच भूसभूशीत
खाली कोसळणारी माती.

स्वतःला कोणताच आकार,
न देऊ शकलेली
कोणताही साचा आपला,
न म्हणू शकलेली
थकलेली, विफल माती

हर्षदा विनया

तूला

परिघावरचं जग,
त्याची अविरत यात्रा,
मीही आहेच प्रवासी,
तरी शोधते भेदरून
तूला.

चालणारे चालतायंत,
पळणारे पळतायंत,
मी मात्र रांगत राहीलेय,
माझी बाळमूठ मागते..
तूला

कश्या पापण्या मिटतात?
कसे उमलतात डोळे?
कसा येतो आणि हरवतो चंद्र
एक स्वप्न पाहतं
तूला.

हर्षदा

तिचं सटवीचं वाण

बाई नाजूक गोजिरी, चवळीची शेंग जशी,
भर भरली अंगानं, बघ मोहरते कशी

अशी काय ती दिवाणी, सांजवेळी फ़िरकली,
नदीकाठी तळ्याकाठी, तिची पावलं रूतली

बाई फ़िरे रानोमाळी, जसं पिसाटलेलं वारं,
तीत नादला तो वेग, मानली वा-यानीही हार

खुळी डोंगर-कपारी, एकलीच गाणी गाते,
फ़ेर धरते हसून, गाभूळली चिंच खाते

बाई वेडी गं वडी गं, वर डोळे वटारते,
मग घाबरून तिला, वर वीज कडाडते

अनवाणी पायांनी, सारं रान धुंडाळते,
काटा बोचला तिला, कि आभाळ पाझरते

बाई वा-याची वा-याची, बाई तशी गं नाठाळ,
अंगाला टोचती नजरा, तरी नाचे बांधूनिया चाळ

बाया बापड्या बघती, घेऊन नजरेत घाण,
तिला फ़िकीर कुणाची, तिचं सटवीचं वाण

तिला फ़िकीर कुणाची, तिचं सटवीचं वाण

हर्षदा विनया.

आणि बस्स.. आई गं !!

इथून पळ, तिथून पळ,
इथे आपट, तिथे आपट,
एक गुद्दा, एक फ़टका,
एक उडी नि मानेला झटका
धाड धाड, खड खडाट..
धडाम धूम आणि बस्सं.. आई गं !

वेडे वेड , वेडाची लिमीट,
क्रूष्णविवर, चंद्रशेखर लिमिट,
इकडॆ रेषा, तिकडे रेषा
लक्ष्मणरेषा, सगळीकडे लिमिट
आडवा छेद, उभा छेद
ह्या आक्रूत्या, त्या आक्रूत्या
तळ्यात उडी किंवा मळ्यात उडी
धाव धाव पळ पळ.. आणि बस्स.. आई गं !

पडला देह, सावरलं मन,
खरचटला देह, फ़ुत्कारले मन
शरीर थंडावले, किंचाळले मन
वर वर स्तब्ध, निस्तेज देह
आत आत आग आग..आणि बस्स.. आई गं !!

..हर्षदा विनया..